Sa y vé dir bonpé zafer sa. Él té i di sa kan in moun navé loto é té i arriv en rotard. Li té i vé dir ke sa té normal, y fo pa roproche à li son rotar parse, dessi la grande route na bonpé zévèneman ni contrôle pa. I pé avoir in l’accidan, in roue la persé, in l’embouteillage tou simpléman, sa i coné d’avans. Sa té i vé dir osi, kan ou sa prend la grande route vodémié alé in pé en avance, ou sra pli sir pou out l’arivé.

Enfin, sa té dann tan avan, koméla na logiciel dessi téléphone portab pou di a ou kel ère ou sa arrivé, y di a ou mêm oussa y fo passé pou arrive à bon port ! Alors parle pi. Mé soloman mézamis kan mi agarde la cirkilation koméla, mi ropans kozeman là. Parlefète, kan mi wa koman ni pran rond-point en foutan, sans clignotant rien. Kan nou essaye finté, koup dovan in moun o lié d’domann a li gentiman in pasaze. Kan mi wa koman lo bann moto y doube par la droite, par la goss, parse zot lé pli présé. An plis ké sa, Astèr y fo osi porte antassion lo bann vélo, kékfoi zot lé pa contan non pli parse ou la pa vi a zot dann rétrovisèr.

Zordi enkor, é bien souvan dé foi, mi ropans kozeman mon momon, dessi la route nou dévré fé in pé plis attention, maziné ke nou lé pa tousèl et ke ni doi partaze à li ek tout domoun.

Ni artrouv pli dvan.
Justin.