La kouyonis lé fasil pou fé !
Nou la fé la kapital Sinni, lo port l’ote koté kap Bernard. Nou la siprime sheminn fèr, san konsèrv l’anplasman la voi. Nou la fé la route litoral an ba d’in kap, koinsé rant la mèr épi la montagn. Kan la di fé la bidèpe, in pé la lèv an guèp... la kouyonis la drèss barikade.

Mète pa tout zèf dann mèm panyé !
N’a in patoi fransé i di konm sa i fo pa mète toute son zèf dann mèm panyé. Ni koné pou kosa. Bin dann la késtyonn transpor, sa lé vré ossi. Sirtou pa aryink in sèl manyèr déplasé ! I fo fé in konbinézon toute manyèr voiyazé : dann train, dann kar, dann loto, déssi in vélo épi d’ote ankor ni sa pa ékri sa issi. Ala kossa demoun saz la déside fé.
Domoun fou, kossa i fé ?
Zot i koné la sazès, sa lé pa byin partazé non pli. Bonpé nana kouran d’èr dann koko. Alor, kan lé konm sa, kosa i fé ? Bin i déside siprime lo tram-train, i déside donn la route la priorité. L’èr-la kosa lé riskab arivé ? I anparl koma sirkilatoir. I anparl, mé kan v’arivé pou vréman, kosa va di, kosa va fé ? Va rofé lo train ? Bin akoz i fé pa sa toutsuite ? Pars la sazès, konm l’intélizans, sa marshandiz lé rar !

Justin