Mézami, mi pans zot konm moin, nou lé pou l’otonomi alimantèr é mi pans bien néna in kantité d’moun lé pou sa koméla. An touléka, kan ou i koz avèk demoun, ou néna linpprésyon demoun i profèr bann produi péi, i pans banna néna l’avnir shé nou. Sof ké, la plipar d’tan demoun i di bann produi ni fabrik isi lé shèr mé lé a oir kant mèm.

Mé oila in lasosyasion la suiv demoun i sava fé zot kours é lo shif zot la kalkilé i fé pa plézir bann rényoné. D’apré sak banna la kalkilé, l’otonomi alimantèr rokouv solman 15 % bann produi rényoné é bann produi déor 85 %. Ni pans sa sé in mové zafèr, in mové sityasion pou nou. Ni pé pa kontinyé konmsa !

Ni pé pa kontinyé konmsa pars dabor inn ni pé fé otroman : otroman pou lo ri, pou mayi, pou mayi-pinm (sorgho), mèm lo blé i pous isi La Rényon. Ni pé ète otonome pou la vyann, pu bann frui, bann légime kisoi fré, kisoi an sirzélé. Ni pé zète otonome pou poisson - an gro pou nout sékirité alimantèr. Ni pé é i fo ni réisi.

Ni pé pa kontinyé pars La frans épi l’érop la foute anou dann in pyèz konmsi nou té arienk in kontoir d’vant pou tout bann produi déor... Ni pé manz bio an touléka san produi shimik, épi san zinsèktisid pa natirèl. Lo randman nout tèr lé bon épi an plis nou lé pa andikapé par in gran livèr : dé, troi rékolt dan l’ané sa la pa pou fé pèr nout bann plantèr.

Kosa i fo fé alor ? I fo mète in plan pou nou trap nout sékirité aliman tèr. Mé kisa I sava fé plan-la ékisa I sava amen ali o bit ? Nou rényoné ? Dké nout éstati i pèrmète pa nou sa. Domaz nout min lé anmaré dann do ! Pourtan ni pé, poitan sé nout shoi, alor fé pété rényoné. Fé pété pou l’otonomi alimantèr.