Akoz ni dékonprèssré pa in pé avèk in bon bouyon brède. A ! Néna poin lontan in soir mwin la gard la télé é sak mwin la vi té plito intéréssan. An plin dann télé néna in moun la prézant in kantité paké brède.L’avé o moins pré d’in vintène kalité. Mi di sa pars kan i parl brède la plipar rant nou i panss : brède sitrouye, shoushou, shou d’shine, paryétèr, morèl, mourong lastron mé néna in bonpé ankor-in diksyonèr i sifiré pa, parsnénna déshoz pou di...Fransh vérité, ala in vré rishèss pou nout manzé péi, épi kan i anparl la sékirité alimantèr ni oi sa in n’afèr i pé ède anou pou ariv laba.

In zour mwin la antann in médsin-in vyé médsin-apré kozé é kossa li téi di ? Li téi di li panss manzé rényoné sé in manzé ékilibré si i baz dsi la tradisyon :do ri, lo grin, brède,avèk in bout la vyann sansa poisson. I parétré bann médsin la fine kalkil kossa in manzé konmsa i pé aport nout kor. Ebin li pé aport anou lo bienètr-mwin la fine dilékilib ébin sa i vé é dir a popré lo mèm zafèr. Sirtou si wi mète avèk sa in yaourt konm produi létyé, sansa in morso fromaz, inn-dé létshi konm, in bout zanana..San tro fors dsi luil, la grèss, lo sik. Ziss sak i fo mé pa pliss.Kan mèm pa bokou mé an sifizanss.

Pou mwin i n’afèr konmsa i rant afon dann la kétyonn la sékirité alimantèr é la sa i intérèss amwin bokou. Mwin la fine asplik amwoin é pa arienk in kou pou dir nou lé issi dann loséan indien, nou lé dsi in pti téritoir avèk son milyé natirèl konm kado é la matyèr griz son bann zanfan konm fiziy é konm zoutiy. Sé pou sa mwin la bien aprésyé la sékans brède dann télé é mi angaj tout demoun issi La Rényon pou dir azot :nou la bézoin la sékirité alimantr pou nout péi épi nout pèp é ni koné sé in n’afèr ni pé trapé. In l’utopie ? Oui mé in l’utopie dovan nout porte,a nout porté. Fransh vérité :Nou lé kapab !