Mardi moi t’apré ékout in radyo é sirtou sak téi intérèss amoin son biltin d’informasyon. Pou kosa moin t’apré akout sa ? pars néna in bonpé nouvèl lé riskab éspasé dsi la tèr é forsé k’sa i intérèss amoin. Ni pé site inn-dé : Dabor zéléksyon dann la Répiblik Maurice, épizapré la kanpagn éléktoral dann GB an souétan BOJO i gingn son rès trankil. Dizon karéman laktyalité la fin d’lané 2019 la pa vid é la pa tris konm in zour san pin.

Mé oila ké mi antann in nouvèl i shatouye mon zorèye : sé la késtyonn riz épi son konsomastyon isi La Rényon. Pass dsi lo problèm la kalité, pass ankor dsi l’éta d’o marshé, pass dsi d’ot zafèr ankor. Mé oila ké lo zoinalis i di, isi shé nou, i ansèrv 45000 tonn do ri shak ané. Zot va dir amoin sa lé énorm é an plis ni pé pa dir nou néna vréman in prodiksyon mé oila :
- Do riz i pé plant La Rényon é mèm zordi néna désèrtin planter i plant bann kiltir la.
- Dori bio i pé planté sa konm dann désèrtin péi, akoz pa isi ?
- Koméla kisoi dann Vietnam, kisoi dan La chine, kisoi ankor Madégaskar sansa dann l’afrik dé l’ouest i plant dori koméla é avèk in for rannman é avèk tout sort bon-bon téknik.
- Arzout èk sa néna la tèr lé pa kiltivé é akoz pa plant dori ? I paré néna 7000 éktar la tèr abandoné zordi.

Anplis ké sa, sète afèr-la i intérèss amoin bien pars nout parti i anparl la sékirité alimantèr - é li la pa atann Macron pou sa,-é li la pa atann non pli bann profète dé malèr apré di partou dori i pous pa isi.
Mé tardra viendra bann plantèr La Rényon va amontr in pé nou lé pa plis, nou lé pa moins, réspèkt anou. La tèr, sa lé konm nout momon é la tèr i lèss pa son bann zanfan tonbé.