Oté

La sékirité alimantèr ? Sa in n’afèr i konsèrn anou !

Justin / 10 séptanm 2018

JPEG - 43.6 ko

Mi sort lir in n’afèr dann bann nouvèl l’aktyalité. I konsèrn in péi lé dann l’Erop mé la pa in péi l’inyon éropéène. Li apèl La Suisse é péi-la i yèm sak li apèl bann votasyon-si zot i vé bann référandome. L’ané dèrnyèr li la fé in votasyon téi port dosi la sékirité alimantèr é néna soisann-dis pour san d’moun la vote pour. In bon shif !

Estèr i sava fé in nouvo votasyon lo vinn-troi séktanm i port ankor dsi l’agrikiltir. Pou kosa ? Dabor lo parti ékolozik i vé, dann in promyé votasyon, dévlop l’agrikiltir pou myé réspèk lo droi bann travayèr, évite pou bann péizan la konkirans inégal, épi zot i avèye galmana in myé z’ète bann zanimo. Dézyèm votasyon i port dsi la souvérènté alimantèr solon sak in sindika agrikol « Uniterre » i propoz dizon banna i vé protèz lo prodiksyon intèryèr. Va konète lo réziltan lo 23 séktanm mé si li lé pozitif-sa lé pa sir !- sar in vré révolisyon pou l’agrikiltir dann lo péi.

Sa sé in n’afèr la fé tilt dan moin pars moin osi mi pans la sékirité alimantèr sé in bon prinsip pou nou épi pou d’ot péi l’oséan indien. Dabor pars nout tèr i pé bien akèye in l’agrikiltir pli progrésist. Dézyèm rézon : pars nou lé dépandan pou nout manjaye sirtou pou nout ri : ni produi pa in grin é poitan sé pou nou konm in nouritir nasyonal. Si ou i azout avèk sa lo bann zémisyon gaz dé sèr arienk pou l’inportasyon épi la sirkilasyon in tèryèr mi pans ni pé pa lès lé shoz konmsa.

An pliské sa, av èk la pèrmakiltir, nou-é d’ot - néna ban bon téksinik pou nou trap nout sékirité alimantèr. Mé, bouj pal o bato ! Lé pa késtyon dann mon tète siprime sansa diminyé kan pars, konm moin la touzour di, kann sé kant mèm nout promyé boué sovtaz par raport tout sak i gingn fé avèk plnat mirak-la… Donk la sékirité alimantèr pa arienk pu La Suisse mé pou nou galman.

Sa lé posib ! Sa lé souétab ! Nout bann plantèr néna la konésans k’i fo pou fé sa ! Sa i konsèrn anou bien épi nout bann voizin loséan indien.