An parmi bann zanimo, néna in pé i antèr pou pass l’ivèr. I di zot i ibèrn. Dann péi déor, néna in bonpé zanimo i ibèrn. Isi, La Rényon mi pans pa néna in bonpé néna so l’bitid dé vi. Krapo, mi koné i antèr dann la séshrèss mé sa la pa in l’ibèrnasyon. An touléka, sak mi koné, tang i antèr é kan li sort - pars si li antèr, in zour i fon li sort li lé blan vèye pa koman. Tang, i paré li apèl Tanrèk é sa sé in zanimo malgash d’apré sak i paré. Inn foi moin la di sa, i fo mi rod si i di sa osi pou l’moun. Lé posib solon zot ? Oui, lé posib ! Sirtou si in moun i éskiv aou pou in mové rézon. Kan ou I bite dsi li ou I pé larg ali in foutan konm sak moin la mark an-o la. Alé ! Mi kite azot rofléshi la dsi é ni artrouv pli d’van sipétadyé.