Nana z’animo dsi la tèr i disparète pandan in sézon. Zot i manj, zot i manj, zot i manj aprésa zot i fouy in trou pou pass l’ivèr, i di zot i antèr. Tang lé konmsa ! Li ibèrn kék moi épizaprè li rosort son trou é li fé oir ali pars l’èr l’arivé pou rofé lo kor, pou prépar pou gingn lo pti… Kozman-la i pé ansèrv dann la sosyété osi : na poin in sézon volèr i disparète ? I anparl pa in sélil dormant pou bann téroris ? Kan li dor sé pa ké li la fine shanj natir, sé ké li antèr pou arsort ankor pli for, pli désidé. Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! zot va oir ké, rant-rant, ni pé z’ète, tazantan, dakor rantre nou.