Sa i rapèl amwin kékshoz la spass dann in zé d’roulète pou la fète lékol..L’avé in morso boukané é mon papa téi vé gingn boukané-la absoliman. Donk li l’ashté la plipar d’biyé.. Dizon li l’ashète toute.L’èr l’arivé pou tourn la rou é in pti kouzin la vni épi la di bonzour son tonton Féliks. Féliks la trap in biyé, inn mèm, épi la done lo kouzin.

Astèr, kroi amwin si zot i vé, kroi pa mwin si zot i vé pa, La rou la tourné é op la tonb dsi lo sèl niméro mon papa l’avé pi pars li l’avé done son nové. Shakinn son shoi é lo kouzin la shoizi in pti lapin blan zyé roz lété an lotri so zour-la. Tanka lo boukané li la rèss, dizon, pou in proshin tiraj.

Alor, kossa zot i diré d’sa ? Sèl shoz a dir, sé ké la shanss ti-poul la pa la shanss ti-kanar é mi kite azot rofléshir la dsi é ni retrouv pli dvan, sipétadyé.

Justin