Mi ansouvien, kan moin té pti marmay, profésèr déssin la amèn tout nout klas Mizé Léon Dierx. Navé poin in bon pé zafèr pou oir sof in fizi. Fizi-la té long minmm. Kan moin la domann kosa sa té fé la, profésèr la réponn amoin : « C’est le fusil de Mussard, chasseur de noirs marrons ».
Moin té koné la shas kaye, tourtrèl. Moin té koné poz in gob pou trap in zoizo. Moin navé in kamarad la di amoin son papa té shass lièv. Mé shasèr d’moun, premié foi moin té antann anparlé. Lé vré, lésklavaz té fini dépi lontan, épi lidé tyé dmoun konm i tié zoizo noré pa vni dan nout tèt.
Bann zésklav té sava maron, sa moin té koné akoz dann nout famy téi koz in pé sï listoir La Rénion. Aprésa, moin la aprann té i shas bann maron pou larzan*.
Kroi pa zot té i mèt santiman la-dan. Zot i fé zot rann kont konmsi lété pa dmoun zot lavé tyé :
« Le détachement a tué 6 autres noirs sur lesquels tout le détachement a tiré et sont les dits noirs tombés morts au bas du rempart » ; « Pierre et Paul Ch.. ont tué un noir inconnu » ; « Gilles T. a tué une négresse ».

*bann shasèr té i koup in min lo moun té i mèt dann zot bèrtèl pou aport la prèv.

Justin