Mézami mi sar di azot kékshoz é lé possib zot lé pa ditou dakor ansanm mwin poitan si ni rofléshi bien.

Si ni rofléshi bien léssans-gazoil é zot shèrté, zot va dir amwin sa l’ariv par la guèr rant la Rissi épi l’Ikrène é par lo band mézir l’otan épi l’érope la pran. Donk gouvèrnman La frans va di, la pa son fote : d’apré li téi falé pran band mézir kont la Rissi é tanpir si sa la goumant lo pri léssans-gazoil-lo gaz.

Astèr si ni pran lé shoz par in n’ot boute :
Ni pé dir si issi La Rényon, la droite avèk gouvèrnman épi parti sosyalis mèm konplis l’avé pa kass la politik lotonomi énèrzétik, zordi politik-la noré té prèss réalizé é lo trikmardaz rissi-Ikrène-otan é konpagni noré pa fé anou sak l’apré fé dopi in koup de tan, konm déga. Ni pé arète la, mé a rogarde in pé pli pré noré ankor bonpé zafèr pou di la dsi kansréti dsu la mondyalizassion, épi lésploitassion kapitalist dsu lo plan internassional.

Astèr si ni pé agarde ankor in kou la vi shèr épi la késtyon d’fon sa i poz dsi lo plan rényoné, avèk la sityassion konm ni koné, ni oi bien la shèrté d’la vi sa sé in problèm de fon-nou na poin lo tan pou diskite ladsi-mé problèm de fon i vé dir trètman d’fon é la pa lo shomin ni pran issi. Nou sré plito avèk lo panyé la ménazère, lo bande pti prime, dann in trètman ké la pa inn : In sorte kotèr-pansman – dsi in zanb doboi.

A bon ékoutèr, salu.

Justin