Dan la kanpagn éléktoral, sé lo moman rankont in pé dmoun kiswa shé zot ou kiswa dann shomin, dan mon tourné-viré so matin, mi sort diskit èk in moun si in sizé ki konsèrn nout tout, si la shérté d’la vi. Li di a mwin li konpran pi poukoué komisyon lé shèr konm sa, é dé zour an zour lo pri i goumant alorské larzan lé kourt touzour. Pou san éro marshandiz marmay si zan i nyabou pouss lo sharyo. Wa ou minm. An plis késa, néna kouran pou péyé, faktir dolo, mitièl, téléfonn, sak na pwin la kaz, néna lwayè pou péyé tousala.

Palfèt sé lo marshandiz ké lé shèr ousinonsa larzan ni gingn lapasé ? Pétèt salèr lé tro ba osi. Koman fèr fas è knout ti moné li di a mwin ? Rogard parouminm pou lésans, ou trouv normal in sèl magazin i vann lésans ? Mèt in pé la konkirans anndan la. Lé vré pou vréman néna désertin landrwa monopol lé for, konm dan lo gaz, gran magazin. Pou téléfonn swa-dizan néna in léspès konkirans mé boudikont zot i antan rantrozot pou kalkil lo pri.

Swa dizan néna déza dmoun i rogard tousala dopré, bann asosiasyon konsomatèr, gouvérman, pouvwar piblik tousala. A mwin mi di, mandoné sé nou ki dwa okip a nou dé tousa. Shak fwa ni sar fé komisyon ni dwa rogard byin lo pri, byin konpar lin a lot. Mi domann a mwin osi si a nou la rènyon vi nout insilatité si nou lé pa plis konsérné ké tout par bann monopol, donkalor par la konkiranss. Dikou li di a mwin nou la débord si nout kozé vik promié abor nou té pou koz si zéléksyon départmantal. Mé baya, la shérté d’la vi lé an parmi.