Na dé foi ou i pé dir sa lé vré : i ariv aou in kanikrosh zordi ! Domin in n’ot l’inkonvényan ou la pa prévi ! Apré ankor in n’ot afèr ! Ou i pé dir lé shoz i dévir pa bien pou ou. Mé, parl-fèt, pou kosa gro vant ? Mi pans sa i vé dir ou i gingn pa évité. Li lé tro gro pou ou pass par koté ! Alor ou i tonm dodan. Mé alon kalkil in kou : na dé shoz i ariv aou, ou la pa rodé : sa sé in vré kou d’shiass. Mé si ou mèm, la mète aou dan lo ka an avoir in tablatir… Sa i pé arivé ! L’èr-la, mi pans ou i pé dir la shiass sé par ou mèm. La pa in késtyonn déstin ! Astèr, mi di, shakinn i amène son bato konm li konpran. Bien sansa mal, final de kont sa i rogard ali. Bone shans, movèz shans tout fason i fo sèy évité. Gouvèrné sé prévoir ! Gouvèrn son vi sé prévoir galman ! Mé dizon la pa touzour posib ! Alé ! ni rotrouv.