Mézami issi dsu la tèr néna d’moune néna la shanss, mé néna d’moune néna la shyass. Sa sé in n’afèr pèrsone i pé pa démanti — anntouléka sé sak mwin la romark par mwin-mèm ; souvan défoi kan in kouran d’shyass i tonb dsu in moune, lé zot i di : « Ou la rodé, ou la gagné ! » mé sak néna la shyass li di pa sa li, li rode kissa la porte ali la dévènne, mèm li va rode kissa la lanss in siguide konte li.

Pars nou rényoné ni kroi lo sor é kan i ariv anou in n’afèr dézagréab ni rode kissa la siguide anou. Poitan, a bien kalkilé, souvan défoi ni fé noute prop malèr. Sé nou k’i fé pa sak i fo fèr kan i fo fèr ; sé nou k’i fé défoi dé shoz k’i fo pa fèr é dann toussa ni oi pa pli loin ké noute boute né.

Alé ! Mi kite azot rofléshi la dsu é ni artrouv plu d’van. Sipétadyé.

Justin