Moin la fine rakont mon dé kok inn aprè lot boufé par bann papang voras ; lo ti bouk moin la trouv rèd la mank do lo ; asteur, sé mé 2 kanar ; mé lékspèrians va fini par rantré !
Oui mazine pa koué in kour antouré i aport konm sékirité ; zanimo larg lé éré, zot i kour partou.

Mi di i mank a moin dé kanar ; konm lo papa ék lo monmon la giny dé pti blan konm zot, mi di mi lés dan la kour lo dé paran mi anminn lo dé zanfan in frèr ék inn sèr (kanar).
Mi anport in gran griyaz, si la tèr mi ferm ék in fil fèr, mi kouv ék in protèz pisine moune la zété si mon térin, moin la fine mèt in panié plastik étans plinn lo po zot, lo grin tout.

Bé lot soir la ver dé zèr dmatin mi antann mon dé zoizoi batt la zèl inn ou dé siin i aboy ; mé mi di koué ispas : moin sé mèt mon lanp frontal, mi ariv si in siin koton blan sal, li pas par andsou lo griyaz li bèz somin ék in ot moin la pa i lo tan voir.
Mon dé kanar bizar, i bouz pi konm avan, on diré lé biin avarié andikapé i boit, i trinn la pat.
Moin sé trap a zot mèt sou ma tant par sékirité ; mi di konm sa ma dor trankil ziska talèr.

Gro tas san si lo do la fémèl, él pli fayi lo mal ; moin sé mèt a zot ansanm dan in kès plastik-sak ban plantèr i port légime dédan.
Lo matin, fémèl kanar la i bouz pi, lo ziè blé la rès ouver ; bon sof do lo, plime a li, lo siin la kas son karkas ; émorazi intern !
Son kamarad artourn la kaz ; laba lé antouré li va géri son ans la giny lantors ; pa d sans.
Fodra mi fé in béton a tèr mi aranz in vré park kanar, lo siin i pasra pa andsou.
La sias nana gro pans vréman !

 Justin