Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,

M’a dir aou in n’afèr. Moin la ékout zot gran shèf rouj dann télé épi moin lété kontan. Pa si tan tèlman pou sak li la di, mé pou bann komantèr li la gingné. A ! Moin lé konm sa moin. Kan demoun lé dann kan bann rouj i fé in l’érèr moin lé kontan é pliské. Ou va dir amoin, kèl lérèr li la fé ? É bin m’a réponn aou. Kakil aou bien, bann fonksyonèr-la, sa i apartien in kalitégori i fo pa toushé sa. Pars zot nana si tèlman l’inflians dsi l’moun ké si ou i toush zot brinn shové, in gran mazorité d’moun i drès an gèp dsi ou. In pé la mète a dir Paul Vergès i vé diminyé salèr bann fonksyonèr. Inn la di Paul Vergès lé kont bann zorèy. Etsétéra, étsétéra, la ké lo ra. La i rode pa sak na rézon, sak na tor la. La i rode solman kisa i sava gingn plis lo kou avèk bann médya, épi dann l’opinyon piblik. La pa bézoin mi fé in désin pou dir aou kisa i lé ? Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, si ou té i égzis pa, nora fali invant aou,

Pars, si ou la bien pran z’informasyon, ou la sirman fine konprann in n’afèr. Bann fonksyonèr i toush in bon moné an plis par raport l’index koréksyon, i sort konprann sak zot i apèl la sir-réminérasyon, konm i di, na poin in baz légal pou La Rényon. Pars sa lété fé kan l’avé lo CFA isi épi lo fran fransé dan la Frans, mé dopi ké lo fran CFA la disparète, donk dopi 1975, lo baz légal i égzis pi*. Donk, konm Paul Vergès la di bann fonksyonèr lé dann l’ilégalité késtyonn pèyman. L’èr-la, kosa i fé ? I koup ? Oi in pé la katastrof si i koup pa, pou zot épi pou La Rényon. Gouvèrnman lé riskab gingn in kondanasyon. I fo trouv in bon solisyon bien ékilibré. Sé sak Paul Vergès la di é li la pa di pliské sa. Mi oi pa in pozisyon pli saz ké sète-la. Bien sir, in pé i vé k’i fé konm l’otrush, i bour zot tète dann in trou galé pou pa oir lo danzé an fas. Mé kan lo shasèr i ariv zot i koné sak i éspas ? Pan ! Son poi lé o-fé. Tok ! Pran sa pou ou !

 
Justin

* Sa sé in désizyon in tribinal La Rényon ké la di sa. Sa la pa in n’afèr invanté.