Oté

La sir-réminérasyon : sa la pa lo monstré lo lockness

Justin / 12 octob 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi koné pa kosa ou i anpans de sa ou mèm épi out bann kamarad rouj mé mi sort ankor antann zot i parl la sir-réminérasyon. Pou zot, sa sé in n’afèr gouvèrnman i sava fé disparète pou ranplas par in pti l’ogmantasyon i koréspon myé-i paré-avèk lo kou d’la vi. Mi koné pa kosa i pé dir dann in z’afèr konmsa : mi pouré dir, parti kominis l’apré asharn ali dsi bann fonksyonèr konmsi zot lété lo résponsab si nana bann problèm shé nou. Mi pouré dir osi, sé konm in sèrpan d’mèr : i koné pa si li égzis pou vréman, mé inn la vi ali par isi, in n’ot par-la. Mèm k’in pé la fé in montaz foto pou amontr lo monstré la-ba dann l’ékos. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, la ou la bate la syans ou la ! Ala, si i suiv aou, ké demoun lé riskab pansé sé lo parti kominis k’i vé k’i siprime la sirréminérasyon. Poitan non ! La prèv, si la sirréminérasyon la bésé na bien lontan té par la droit, é mèm dann tan-la Raymond Barre, in rényoné, lété promyé minis.

Astèr sé la kour bann kont k’i domann lo gouvèrnman pou abès la sir-réminérasyon pars sé in manyèr pou fé zékonomi-plis 300 milyon l’éro, si mi tronp pa. Astèr la kour bann kont i propoz mé sé lo gouvèrnman k’i dispoz - lo gouvèrnman épi lo parloman-. Donk, l’afèr lé pa kui, mé i fo prann sa o sèryé kansréti pars dann bann kandida lo zéléksyon k’i vien néna désèrtin k’i pé arpran sa dann z’ot prozé.

Astèr matant, lès amoin dir aou lo sir-réminérasyon la pa in sèrpann mèr. Ké li pé disparète, sa la pa non pli in sèrpann mèr. Pou inn konm pou l’ot sa la pa, alor pa ditou, lo montré lo locknèss [1] . Tok ! Pran sa pou ou !

[1sa in vyé zistoir, mé lé vré na in moun la fé in montaz foto pou dir lo monstré i égzis ; Mé final de kont lété in gob !