Mi sava pa tro di granshoz la dsu sof ké mwin lé a d’mandé kissa k’ i désside vréman dann in n’afèr konmsa : lo pouvoir égzékitif — lo prézidan — lo pouvoir lézislatif - mé mwin la fine dir la pa domande ali kèl koté brinzèl i sharj. Osinonsa, néna kékpar in kabiné sogré avèk in paké d’milyardèr épi konm sèl obzéktif grossi zot pla — é pa ogmante bande rotrète natirèlman pars la natir lo gouvèrnman sé d’grossi lo pla bande demoune néna lo moiyin.

Par l’fète, in zour mwin lété dann in éstaz é l’amontrèr pou parl bande rotrète lété in patron téi sorte dann dyab bouyi dan La Franss é li téi ésplike anou, in zour shake pèrsone nora lé moiyin, shak fin d’moi, v’alé porte son rotrète in pti vyé moune. So zour-la nora otan d’moune travayan ké d’moune à la rotrète... Lotozour mwin la ékoute Macron kozé é son diskour lété pa tro loin sète l’amontrèr mi anparl azot an-o la.

Dann mon kèr, an ékoutan ali, mwin téi di sa in onte sa. Kan La Franss téi sorte la guèr minist la sékirité sossyal lo kominis Ambroise Croizat l’avé in diskour bonpé pli progrèssist ké sa é dann tan-la bande franssé la zamé di lo réjime rotrète té dann danzé... Bon ! Mi sava pa dépouille toute bande mansonz pars mi panss l’apré fé prande anou po d’shanm pou pla kouvèr, makaroni pou la bouji é pa pliské sa.

Mi sava pa non pli koze pou bande franssé mé mi panss mon bande konpatriyote rényoné é toute sak néna pti rotrète é mi di dan mwin-mèm : ala bande moune té zanfan pov étan zanfan, travayèr pov étan dann la vi aktiv, rotrété pov dan la rotrète-donk pov toute zot vi avèk in modèl de vi fé par d’moune anlèr pou foute azot dedan ankor pliss é pandan tan-la, konm i di, kabri i manz salade.

A bon antandèr, salu !

Justin