Mézami, oila in kozman mwin lé sir mwin la fine anparl azot é pa arienk in foi mé zordi mi panss kozman-la é mi di lé pa initil arparl dé li. Normal dann in sossyété lé an manke zistoman sète afèr inpportan i apèl la solidarité, in pikir d’rapèl la pa initil.

Kissa rante nou in zour la pa kass in poigné, sansa in min, otroman la pa rotrouv ali pou in tan avèk lizaz in sèl min é zour-la lété bien annuiyé kansréti sinploman pou lav son min ? L’èr-la ni oi noute dë min lé bien itil.

Pou mwin konm pou bonpé d’moune i pratik kozman-la sa sé la solidariité, kékshoz k’i fé k’inn lé bien nésséssèr pou lav l’ote é l’ote lé bien nésséssèr pou lav inn. Kékshoz k’i amontr anou shak éstan dan noute vi, la solidarité sa in prinssip éssanssyèl noute viv ansanm dan la sossyété.

Alé ! Mi kite azot rofléshi la dsi é ni rotrouv pli d’van, sipétadyé.

Justin