Kissa la di la lite dé klas la fini ? Kissa la di, koméla, bann klas i marsh la min dan la min ? Tout nana mèm lintéré !
Dann in éstassion lésans, bann pèrsonèl i fé la grèv dépi in bon koup de tan déza. Lo nouvo patron la désid rash le kro in moun nana vinn-troi zané i travay tèr-la. Alor, lé z’ot travayèr, kan zot la vi na poin in koz sérié pou lisansié zot kamarad, zot gaz la monté épi zot la mète atèr.
Lo patron, li, li konpran pa sak i ariv : son pèrsonèl i travay pa, li pèrd kèk mil euro par zour épi bann travayèr i di zot i vé arprann travay si i arpran zot kolèg. Solman, lo patron i vé pa arprann lo travayèr lisansié, li vé pa aranval son vomi. Alor, i rès konm sa mèm !
Lé vré, la vi lé dir pou tout travayèr. Lé vré, lé pli préférab travay, gingn son moné plito k’rès debout, sansa kat pat asiz toute in zourné. Solman, banna i di konmsa : si ni fé pa arien pou nout kolèg, koman ni sar rogard anou dann in glas granmatin, san mazine mové zafèr dsi nou-mèm.
Zot i di : i fo ète solidèr ! La solidarité, sa in gayar mo-sa, mon bann dalon !

Justin