Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

La solidarité, sé kant mèm in prinsip de fon pou la kopérativ !

lindi 10 zwin 2013, sanm Justin

Mi koné pa si zot i pans konm moin dsi la késtyonn bann kopérativ. Pou moin, in kopérativ na plito in bon répitasyon é sirtou, sanm pou moin li viz pa lo profi tout fors. Donk, mi fé, dann mon tèt la diférans rant in kopérativ épi in l’antropriz kapitalis.

I mank pa bann kopérativ isi mèm La Rényon, épi in pé partou... Zot i souvien na poin lontan in ga la mont in kopérativ pou fé v’nir do ri épi d’ot marshandiz méyèr marshé ké dann komèrs détay, pou sèy pèz dsi lo kou d’la vi, donk pou goumant lo pouvoir d’asha bann konsomatèr. Mi rapèl désèrtin kamarad Troi Bassin la mont kopérativ pou sèy fé an sort son bann zasosyé i fé zot mèm zot prop travay... Dann Por nana in kopérativ ouvriyèr bann dokèr... Pou moin, sa i pé ansèrv modèl pou mèt anlèr lo dévlopman La Rényon. Sa lé inportan, pars nou la bézoin nout péi i dévlop, mé nou la bézoin osi bann lantropriz i raz pa bann travayèr asèk. Dizon, in manyèr pou lit kont lésploitasyon la fors travay lo moun.

Solman si sa lé dann mon tèt, lé pa forséman vré pou vréman. Pou kosa mi di sa ? Pars dann nout zournal la amontr in mayaz rant plizyèr kopérativ ; lakèl ? L’Urcoopa, la Cilam, la Sica Lait épi d’ot ankor. Moin la romark bann gro vaza lé dann inn, épi dann l’ot épi ankor dann l’ot. Zot pla lé bien gonflé é zot lé ini konm lo doi d’la min kont lo zintéré bann ti-kolon... Pétète moin na tor é si sé lo ka, mi èmré bien bann konésèr i ésplik amoin pou koué. Mé pétèt osi moin na rézon omoins dan sak i konsèrn la filozofi lo sistèm kopératif. La solidarité sé kant mèm in prinsip do fon la koérativ sa, si mi tronp pa.

NB : Konm Téréos sé in kopérativ, donk tout lé posib.

 Justin 


Inn modékri, inn ti lavi, inn komantèr ?

signaler contenu


Facebook Twitter Linkedin Google plus