Dopi in bon bout lo tan, mi kas mon tète pou trouv solisyon in problèm. Problèm-la i port dsi kann é ni pé poz ali konmsa. Si in plantèr i tiliz pa ditou l’angré shimik dann son karo kann, li pé sansa li pé pa an avoir lo mêm,pétète in pli for, rannman-o-shan ké si li anploy l’angré shimik ? Mi oi déza in pé apré fé in sourir an transh papaye é apré di : "Justin, la tèt la gaté !" afors li l’apré kalkilé, arkalkilé, pèrd la nuit dsi in problèm na poinn solisyon.Poitan zot mèm, si zot té marmay la kanpagn,si dann koin zot kaz l’avé inn-dé touf kann, zot la sirman romarké ké, konm di lo kont, zot ti karo pèrsonèl té pli joli ké lo shan zot papa. Lé vré, lé pa vré ? Mèm si zot téi mète pa l’angré dédan, sirtou si la tèr té fine bien ropozé plizyèr z’ané...Mé zot va di, pou dé-troi touf kann lé vré, mé si i plant in karo sar pi parèy. Mi san kant mèm zot i majine sa mé zot sèrtitid i komans afayir in pé. Mi rokomann azot pa di amoin sa lé moin dou, pars l’èr-la zot i koné la pa vré non pli.

Moin la parti fouy dosi l’internet é moin la trouv in n’afèr la fé travay mon tèt, lété la kiltir biolozik kann la-ba dann Brézil. Bin i paré lo rannman-o-shan lé près dé foi pli for k’isi La Rénion pou in plantasion pa biolozik, avèk l’angré shimik é tout lo tranbléman... Donk,moin té i pans déza an avoir trouv la solisyon mon problèm i tourn an blouk dann mon tète...Ala ké yèr soir, moin té apré rogard dsi l’internet sak i apèl la kiltir an "konsèrvasyon" é moin la trouv in vidéo in plantèr-shèrshèr-rodèr-trouvèr. Ala a popré sak i di dodan : li plant san labouré-li dévir pa la tèr vant an l’èr- li kouvèr toultan son tèr avèk plantasion ti-trèf épi d’ot shoz donk li na in tèr bien vivan avèk vèr d’tèr, ti kankrola, épi rasine i dsann in mète sinkant dan la tèr. Li plant pa kann mé li plant mayi. Figuir azot son rannman mayi lé pli for ké san kintal l’éktar-in kintal sa i fé san kilo !-. zot i pé alé gardé dsi you tube, sak mi di sé la vérité vré.

L’èr-la, mi di, moin la fine près trouv la solisyon mon problèm. Pou kosa près ? Pars moin la pankor trouv lo mèm lékspèryans avèk in gran karo kann, mé mi di si ou na in tèr bien vivan, si ou i plant in bon varyété kann konm sak nana isi la Rényon, si ou i okip out tèr konm la prinèl mon zyé, ébin ou lé parti pou an avoir in pliské bon rannman kann dann lo shan san l’angré, san gaspiy tro d’lo arienk avèk l’ède nout bann z’ami k’i grouy dan la tèr, épi bann ti rasine i sava rode la tèr mouyé dan la profondèr. Nou lé kapab trouv la solisyon in problèm soi dizan san solisyon.

Justin

NB In pti provèrb pou la rout : "Pa kapab lé mor san éséyé !".Mi fé pa lo komantèr pars mi pans zot i nyabou fé sa. Arzout èk sa mon modékri lé déza tro long.