Bann zansien lé ankor la pou dir anou dann la guèr mil nèf san trant-nèf karante sink noute popilassion lété bien anbété dann tan bann zanglé la blok Lo por La Rényon pou anpèsh marshandiz rantré é si zot i fé koz bann zansien zot va antann koman so tan-la la tromatiz azot épi nou mèm k’i koné bann zistoir-la.

Pou sak lé pli jenn zot i rapèl sirman la guèr la déklansh laba dann l’Irak é koman nou té privé nout bann nouritir d’baz pars bann bato téi akost pi dann port. I paré mèm dann tan-la demoune la bataye pou in sassé d’ri dann bann grann sirfass . Sak lé sir sé ké dann tan-la demoune nora pa priv azot d’in sassd’ri pou ède aou-noute solidarité l’avé kass par boute dann tan-la .

Si ni rogarde bien laktyalité ni apèrssoi dopi in koupe de tan la guèr i pète in pé partou é sak l’ariv anou dann passé lé riskab ariv anou d’issi kéktan si bann dirizan in bonpé péi i kontinyé pèrde la tète konm zot l’apré pèrde zordi.

Astèr kan ni rogarde noute kapassité : noute tèr, la konpétanss noute bann zagrikiltèr, la formassion noute bann jenn, toussa la tèr lé an frish-pliss kinz mil éktar a s’ki paré.Ni di la souvrèneté alimantèr sa sé kékshoz ni vien abou assiré sa é si ni fé in plan é si i mobiliz noute bann konpétanss, kan l’èr v’arivé, ni souf ar pa, é nou lé kapab assir noute manzé.

Pou sa, i fo k’in zour ni komanss.In pé i plante dori déza.d’ote i plante ravaz épi i vann, d’ote ankor i plante léguime é nou lé prèss otonome la dan.Alor, siouplé bann zotorité, kite anou trape noute souvrèneté alimantèr. Kite anou amontr noute kapassité é noute popilassion nora pwin pou soufèr initil si lo tan ni krin i rovien.

A bon antandèr salu !