Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, mi antann azot bann rouj-de-fon apré réklam in plan pou éfas bann pli mové konsékans la povrété. Poitan, si ni kalkil bien lé shoz, nou lé forsé romark néna in progré rant lontan épi koméla. Lé sir si in pé zordi ankor i fors pa asé i fo zot i konpran zot sityasion moral, matèryèl, sé la konsékans sak zot i fé, sansa sak zot i fé pa. Pou moin néna in kozman mi aprésyé ankor zordi sé lo ède-toi é lo syèl va ède a toué. Tok ! Pran sa pou toi !

Justin la fé pou répons :
Mon vyé matant k’i koz la boush rouvèr, i étone pa moin tout sak ou i di, tout sak ou i kroi é sak lé domaz sé ké ou-avèk in bann moun égoïs-zot i pans ya ka, zot i pans fo k’on alé oir lo problèm lé la dovan zot é i fo tash moiyin trète ali, in poin sé tou.
Mi antan d’isi demoun apré di la sityasion lé konmsa Madégaskar pars bann malgash lé san réaksyon dovan i n sityasion konm sak zot i koné… Pou La Rényon lé ankor pli pir : i sifi mète la fote dsi bann srilan ké, sansa dsi bann maoré épi bann komorien épi i sifi d’vote pou lo fron nasyonal é kroir tout v’alé bien konm dsi dé roulète.
Antansyon i fo pa konfonn la téknik avèk in stratézi. In téknik i ariv a règ in problèm téknik, in stratézi lé fé pou règ bann problèm inportan. Moin la touzour di, si lo mond lé konm li lé avèk in bonpé z’inégalité avèk la rishèss antasé dsi in pol, é la povreté antasé a l’ot, sa la pa in problèm téknik mé in problèm par raport nout stratézi : shanj politik san pour san pou san. Tok ! Pran sa pou ou é mète out moushoir par dsi.