Matante Zélida la ékri :
Mon shèr fi d’gars dé nové, i étoneré pa moin si ou gingn in kou d’apopléksi ou-la. Ou i dovine pa a popré pou kossa ? Ou k’lé touzour apré malparl la Frans déssi la késtionn péi komor... Ou lé bien asiz ? Tout fason, la pa mon traka si ou bate out fès a tèr... Donk, lo minis loutemèr i sort désid bann zanfan komor sak lé pa an droi rès Mayotte i poura pa zamé domann nasionalité fransèz : oki d’droi di sol pou zot ! Ou i oi konm la droite lé for ? Bouz aou astèr. Mi souète aou lo bonsoir san z’oublié Justine, épi z’ot bann valal.

Justin la réponn :
Mon vié matante vénan d’ou, sa i fé pa moin arien, vik ou lé fine grandi lo domèn la kouyonis pa rienk in foi. Soman, in minis la Frans i di in n’afèr konmsa, sa i rann amoin tris. Akoz, i modifié pa in prinsip konstitisionèl avèk in sirkilèr ministérièl, mèm in dékré, mèm in loi. I fo modifié la konsitision pou sa, épi lo kod la nasionalité... Kroi amoin, si li fé sak li la di, pour sir, li sar gingn in sak lo kou dovan tribinal : la tète la bloké sa !
Alé, vié shoz, lé fine tar : solèy la fine lav son pié ! Na artrouvé !

Justin