Mi koné pa si zot lé konm moin, mé kan mi rant dann in gran sirfas, é kan mi oi lo pri bann marshandiz, moin l’apré domann amoin toultan konbyin bann abizèr i pran dann mon posh san k’mi konpran.
A ! zot i mète lo pri : sa lé afishé ! Zot i mèt mèm lo pri par kilo : sa lé marké ! Zot i mark galman pou inn dé z’afèr sak zot i apèl la konpozisyon, ziska bann zépis, bann koloran, bann konsèrvatèr, bann zoméga, étsétéra-étsétéra la ké lo ra… !

Mé na d’zafèr mi vé konèt… é mi koné pa :

- konbyin l’ashté pou vann lo pri k’i vann ;

- dann konbyin min la pasé avan ariv dann magazin ;

- konbyin grosis la tir zot tar la-dsi ;

- konbyin taks la péyé ;

- si marshandiz i sort déor, konbyin la pèy transpor…

Kosa ? Mi antan in pé apré margogné : i di lé pa posib, lé tro konpliké, va kout ankor pli shèr si i fé sa !
A bon ! Koméla i gingn bat karé dann léspas, voiyaz dann bann sélil demoun, fé robo pou opèr d’moun a la plas médsin é sa i gingn pa ? Ou sinonsa, i vo pa la pène ?

Byinsir k’i vo la pène !
Kansréti, pou konèt konbyin abizèr d’si nou l’apré angrésé, konbyin lo vèr l’apré pik nout kèr.
Kansréti pou suiv in pé la rout bann pri.
Konm i di, pou la transparans… !

Justin