Mi sort lir dann in zournal déor in rapor la kour dé kont si lo travay o nwar an frans. Otromandi, si lo bann patron frodèr. I apèl sa la frod o kotisasyon sosial. Zot i déklar pa travayèr konm i fo, défwa i déklar pa ditou, konm in pé i déklar pa z’inpo. Dikou l’arzan i rant pi é banna i di i mank o mwin 20 miliar pou boush lo trou la séki. Dann son rapor la kour i dénons lo travay disimilé, pou nou sé travay o nwar, é tousala i éspass an frans é plito dan la konstriksyon batiman é osi dann komèrs. Zot i konpran po kosa i anparl lo trou la séki tout l’tan é oplis i boush lo trou oplis lo trou i grandi. Dopi in koup dotan mi sèy ékout lo minis di travay po war si li koz in pé d’si la frod la, konm li la dénons bann shomèr pol enplwa intan, swadizan banna la fé la frod o préstasyon sosial, mi antan pa li,zorèy koshon. Sa i fé rapèl a mwin koseman in kamarad té i di « Justin, in kolon dé drwat ou in kolon dé gosh, i rèst in kolon » la lé parèy in gro frodèr, ou in ti frodèr,i rèst in frodèr.

Pou rovni si bann travayèr, lo tan la finn gaté pou zot. I rann a zot koupab tout z’afèr, la nèz i tonm sé zot, la pli lé an boufad sé zot. Tout mové nouvèl i tonm si zot. Pou kosa mi di sa ? Ala in minis i sort maltrèt a zot pli ba k’la tèr, pli ba k’lo shyin é antrot i di, zot tout sé in takon z’ilétré. Sa in koseman pou kass paleto. Koman in minis i pé koz konmsa ? Di pa nou li koné pa kosa li di, ké li koné pa osi la vi in travayèr ? Kisoi in travayèr la tèr, kisoi in travayèr batiman ? Sinonsa d’ot. Sa i fé pans amwin kosé in limoris an frans, li rakont : « Dié la di, nana moun nwar, nana moun blan, nana lé p’ti, nana lé gran, nana moun bo nana vilin moun, é tout lé ego, mé lé pa fasil. Mé li arzout, si toué lé p’ti, nwar é mosh é bin pou toué sora tré dir » parl pi si toué lé oki é ilétré.

Pou la frod, bann patron i pé dormi trankil, parsk la kour i arzout, z’inspéktèr pou kontrolé i mank,é pi kont pa si gouvernman la pou anpongn a zot, parsk dopi inkoup dotan zot i tyinbo l’in a l’ot konm la kord i tyinbo lo pandi ou konm la trip i soutyin la pans.