Mésyé, médam, la sosyété, mi pans, konm moin, zot i koné kozman-la dopi in bon bout tan. Si ni rogard lo kozman bien konm ki fo, sans prop, ni konpran ali : si ou néna in zanimo an voi d’famiy é si ou i apèrsoi i fo sakrifyé kisoi la mèr, kisoi lo pti i ariv ou i shoizi sov lo pti mé lèrla ou i koné la mèr va pète lof. In zour moin la suiv in fime téi apèl Lo Cardinal é sa la mark amoin pars doktèr l’avé lo shoi rant sakrifyé la mèr-par l’fète la nyès lo cardinal - pou sov lo zanfan, kisoi vèrsi-vèrsa, téi sov lo zanfan é téi sakrifyé lo momon. Dann fime-la, si mi tronp pa, la shoizi sakrifyé lo momon. A zot de oir ! a zot dé zizé !. Astèr in bonpé d’moun i aplik kozman-l a dsi zot bitasyon é pa pli tar k’so matin moin la antann sa dann marshé forin : in moun té apré di, li la nouri so n tèr avèk langré an kantité, plis d’ot produi shimik. Rézilta : astèr li sava lèss son tèr ropoz pandan sète moi pou rofé. Li mèm, li té apré di : « li la tyé la mèr pou sov lo pti ! »é astèr la mèr lé afayi é lo pti kaniki i fo oir. Alé ! Mi kite azot rofléshi la dsi é ni artrouv pli d’van. Sipétadyé !