Dimansh soir, moin la gard z’aktyalité dann télé. L’avé in pti sékans déssi moniman pou bann z’am érante la Mcur la déside dréssé dann simetyèr Père Lafosse, la-ba kosté l’izine Le Gol. Dizon, sa in bone idé, vi k’sa i pèrmète in gran kantité d’moun viv, kansréti in pti pé, in pé se l’évènman-la.
Solman antansyon, si i anparl l’Istoir La Rényon, i fo ou lé sir sak ou i rakonte, sansa ou i di ou lé pa sir... sansa ou i mazine... sinonsa ou i sipoz. Pars kan i anparl Père Lafosse épi ou i di té in "pti blan", alé oir moun-la lé né dan La France... kan i di déssèrtin l’assassine ali pou son z’idé, in n’afèr pèrsone la pa prouvé ziska zordi mèm si bann ti-kolon té i kroi... ou i réspèkt pa la vérité dann l’Istoir. Konète la vérité lé pa oblizé, mé fé in n’éfor pou konète, sa lé obligatoir... Nana ankor d’ote shoz i kol pa avèk la vérité... kansréti lo rol la minisipalité Claude Hoareau épi sak nout vyé dalon Abner la fé pou armète in pé vyé simetyèr-la an form.
Mi pans inn-dé roshèrch déssi internet nora pèrmète, san tro kass son tète, évite di la bétiz... épi in bétiz kan ou na moiyin fé antann aou partou, fé oir z’imaz partou sa lé séryé sa ! Ala pou kossa, i vo myé byin kalkilé, pran pékosyon, manyé an réspé la vérité dann nout l’Istoir.
Fransh vérité, i dékone pa èk sa !

Justin