Antansyon, mi di pa toute demoun shé nou i sava dor la vant plin pars néna kante mèm sak lé an mank di motif di poikoi-larzan si zot i vé – tazantan dan lo moi. Mé sa i parvien par in mové politik inégalitère, in mové partaze bande rishèss é lé irjan vanj konte in n’afèr konmsa. Mé la pa pou sa ké nou lé pa pou lotonomi alimantère pars sa ii vé pa dire demoune sar an mank manzési noute péi i produi sak i fo pou kontante son popilassion. Toute fasson sa i anpèsh p nou fé noute rézèrv an tan vouli.

Néna térin pou lo plantaz, klima lé plito bon, la tèr lé plito rish é bann plantèr isi shé nou la kapassité k’i fo pou produi... Mèm sak lé pa plantèr i pé mète ali dan la parti par bann zardin partazé, zardin an vil, zardin an balkon, même in pti boute la kour. Arzoute èk sa in bon formassion, in bon lédikassion popilère dann lo plantaze épi in bon travaye dsi bande somanss. Epi kissa i anpèsh anou zoué la solidarité avèk noute bande voizin ! In min i lav l’ote : ala in bon prinsipe de vi.

Mé mi pé dir azot toutsuite, é la ùmwin lé pliské sir la pa toulmoune sar pa dakor san pour san avèk mwin mé oila : la sékirité alimantèr i pé pa zape bande prodiksyon la kalité. An kontrère lipé pouss la dsi ! Sa i pé pa anpèsh anou plante nopute kann é pa arienk pou fé d’sik… Mé pou lénèrzi galman, – kann lénèrji-pou sèrv konm baz lindistrializasyon nout péi-mi rodi, dann kann i pé tir plizyèr santène koprodui é sa sé in mine d’or pou nou. I anpèsh arpa nou fé not kafé bourbon pointi, nout thé blan, nout jèrniom la kalité, épi tizane, épi médikaman an siro sansa an zélil. Toussala lé konpatb avèk noute lotonomi alimantère.

Mé zami, ptète zot i panss mi rèv, mé sa la pa in rèv ditou : nou lé an kapassité pou fé sa é kan l’anvi, la kapassité, épi la néséssité i fé la rankont, nou lé paré pou alé an avan. Konm i di souvan, la vérité i avans dousman mé li fini par avansé.