Matante Zélida la ékrir Justin :
Mon shèr nové, mon spès salté,
Koman i lé ? Mi éspèr ou la pa mank laspirine pou soulaz out tèt ? Bann rouj de fon i èm pa kan in rouj de fon konm zot i gingn kozman... mèm kan lé mérité é pliské ! Mi éspèr out zorèy la siflé, kan demoun té apré di zot kat vérité... Alor, pandan k’in pé l’apré tash moiyen travay, la Réjion, san fé arien, i ramas in milion. Dizon li la trouv trézor La Buse* déssi le do bann Rénioné...

Justin la fé pou répons :
Mon vié matante, moin la pa ont dir aou, kan i atak inn an parmi mon bann kamarad, mi soufèr, sirtou kan mi an apèrsoi i atak ali a tor... Matant, i fo pa gnoré, pou k’in lékonomi i marsh, i fo fé projé, épi mèt larjan anndan. La Réjion i fé sa, é in pé plis ké d’ot, mi jur aou : la rout Tamarin la pa fé avèk la krash sa ! Parèy demin pou tram- trin, parèy ankor pou la rout an kornish épi bann moiyin shantié... Mi sort antann dir Réjion La Rénion i invèsti près dé foi plis k’in réjion dan la Frans.
Ala la vérité. Èl nana tèt dir ! Pti lanp-pti lanp èl i fé son ni. La mansonjri, la pat lé kourt : vitman-vitman la vérité va souk ali.

* Ollivier Vasseur dit La Buse, sa in pirate la lès in nom dann listoir La Rénion, solman son trézor, i prétan la pèrd.

Justin