Oila sak la éspassé :

In zour, mi sava marshé forin pou ashté do koi fé in salade russ. Lé sinp : i fo mi pran dozèf pa tro-tro fré pou bien tir la kok,i fo mi pran karote, ponm’tèr, bétrave, épi dé-troi zafèr mi sité pa lo nom mé mwin lé siréssèrtin zot i antrovoi kossa k’i lé... Lo bazardié li ossi li koné é an dë tan troi mouvman mon pti bazar lé fé.

L’èrla lo bazardyé i di amwin si mi vé k’i koute lo fèye-i paré sa i apèl lo fane-antouléka li domande amwin si i koup si i koupe pa... Mi di : « koupé » pars mwin na poin lapin ,ni tortu donk sé amenn la salté la kaz sansa amenn sa pou ète dann mon konpost, mé zour-la mwin téi vé mèm pa pa sa. « Koupé ! » é oila k’li koupe avèk in bone volonté romarkab, in l’aplikassyon vèye pa koman !

Donk mon tour fini in pti madame èl ossi èl i vé ashté léguime po son salade russ .Lo bazardyé i done aèl satisfakssyon an dê tan, troi mouvman épi ,normal, li di avèk èl : « Natirèlman mi koupe lo bande fane ! ».Lo madame i di : « Sirtou pa ! ». Lo bazardyé in pé dézarsonné i di avèk èl : « Madame néna lapin, poul, koshondin ? ». Lo madame i di : « Non, mé èl i gaspiye pa lo fane pars sa lé bien bon pou fé la soupe épi d’ote zafèr ankor. »

Lo bazardyé i fé konm lo madame i di épi kan lo madam lé fine alé, li rode in konfidan épi li di : « La pa inn shyass in n’afèr konmsa ! koman demoune lé pirate konmsa ? ». Mi réponde pa mé mi di ali proshène foi koupe pa lo fèy pou mwin, sansa mi anpèrde o moinss lo tyèr d’poi.Mi ramass mon n’afèr épi mi sava é mi san déyèr mon do in rogard lour ki pèze si moin.Zis lo tan rotourn in pé la tète é mi oi li apré rogarde amwin gro zyé.

Kossa la pass dann son tète,mi koné pa.Pétète li téi oi ali pèrdan dann sète afèr-la,Osinonsa sa téi poz ali in gro problème kiltirèl. Arivé mon kaz mwin la pa bvante amwin avèk mon gouv èrnman, mwin la ziss rakonté , mé mon zistoir la pa raporte amwin inn doz konpliman, ziss in foutan konm : « aou ossi wi sa done fanm-la rézon ou la ? »

Poitan kissa na rézon ladan ?A bon ékoutèr, salu.