Si ni désside anparl in kou lotonomi dann l’énèrzi… Zot i rapèl lo prozé Paul Vergès l’avé lanssé étan prézidan konsèye Réjyonal tèl fasson k’bann sours d’énèrji prop i ranplass firamézir bann sours d’énèrzi. Paul téi propoz kékshoz sinp : li téi vé La Rényon i ranplass lo pétrol épi lo sharbon par in miks énèrzétik é sa avan k’ téi i anparl sa an Franss.

Si zot i rapèl bien dann miks-la l’avé lénèrzi bann rivyèr, sète volkan, sète la mèr, épi lo solèye, lo van-dèrnyèrman la komanss parl sèryèzman lidrojène… É néna mèm in léspèryanss an kour pou produi lidrojène issi la rényon… Manke de shanss, dann tan-la l’éta épi son fèr d’lanss l’EDF té pankor adèr avèk lénèrji prop. La droite rényonèz èl ossi lété pa pou sa, é mèm la lanss avèk bann kamionèr in prozé ridikil pou ashté karbiran bon marshé mé ni koné koman sa la fini : sa la fini an lo d’boudin.

La fin d’lénèrzi prop ?Zamé, lénèrji prop lété pli nésséssèr ké zamé si tèlman èl la rokomanss son marsh an avan an vu d’ranplass lénèrji fossil. Paul lé mor zordi mé son bann zidé la kontinyé avanssé é lé pa fini. Si tan tèlman firamézir zidé noute kamarad épi sète noute parti avèk anpliss bann zidé bonpé rényoné ni oi bien sa l’apré pouss bann zénèrji prop an avan. Ziska kéni trape noute lotonomi énèrzétik avèk bann zénèrji prop.

Toussa pou dir la vérité é léfikassité, lé zamé batu.an kontrèr zot marsh an avan va kontinyé é lé bien pars antrotan nou va konbate konte lo dérègloman klimatik a noute nivo kansréti pou amontr La Rényon épi lo pèp rényoné i gingn prann son résponssabilité kan i fo.

A bon antandèr, salu !