Oté

La vérité na in sèl koulèr ! Alé kroir sa ou !

Justin / 8 févrié 2019

JPEG - 43.6 ko

Mi pans zot tout i koné patoi kréol i di konmsa : « La vérité na in sèl koulèr ! » é nou té i di koulèr-la sé lo rouz. In pé téi i di : sé lo blé-blan-rouz mé konm zot i konpran sé inkéstyon d’opinyon… Pars, an vérité, néna la vérité ofisyèl : sak bann z’ofisyèl la fabriké é ak bann médya la bate tanbour pou fé kroir li lé pli vré ké lo vré.

Pou kosa mi di sa par l’fète ? Pars mi v é anparl bann srilanké. Ou i antan I parl de zot partou konm in tan téi parl bann komor épi bann maoré, konm téi parl bann zarab épi bann shinoi… tousala pou évite parl bann zésploitèr, bann oprésèr, bann résponsab la sityasion la plipar d’moun.

Si mi di azot inn-dé kozman mi antan moin lé sir zot sar pa étoné pars zot osi i antan bann zafèr konmsa. Ala sak mi antan : koman banna la fé pou ariv isi La Rényon dann bann kok pistash konmsa, koman i fé kat mil kilomète la dan ? Kisa i donn sa manzé ? Nou néna pov galman isi La Rényon, akoz ni komans pa par okip nout bann pov ? Etsé téri-étsétéra la ké lo ra.

Na in rézon i fé vnir azot isi ! Néna mèm plizyèr rézon ! Pars si in moun lé bien shé li, li vien pa dann péi lé zot sof pou fé in pé lo touris mé sa i fo an avoir lo moiyin. Di pa la fé la guèr laba ! Di pa néna l’intolérans rolizyèz épi politik. Di pa sa pars kisa i sava kroir aou dann in klima lintolérans konm sa. La poin pou ékout aou la : lé konmsa é pa otroman. La vérité néna in sèl koulèr ! Alé kroir sa ou !