Oté

La vérité sé pi la vérité kan li suiv lidéolozi dominante

Justin / 5 désanm 2018

JPEG - 43.6 ko

Mon bann dalon, mi pans zot i pans konm moin a popré. Mi pans bann késtyon mi poz amoin dann mon kèr sansa dann mon tète zot osi zot i poz azot bann késtyon-la... Lé normal, nou l’aprann réfléshi dann nout zournal Témoignages é nou l’avé la shans an avoir an parmi nout bann z’ansien demoun kisoi dann nout parti, kisoi dann nout sindika l’amontr anou lo fason la pli korèk posib pou rofléshi.

Nout labitid rofléshi sé sak i apèl la dyaléktik é la dyaléktik i amontr anou lo progré la pa in mèr kalm. La plipar d’tan li vien par l’afrontman bann fors kontrèr, bann zidé kontrèr. Nou l’aprann l sosyété lé divizé an klass : in tan lété la noblèss épi lo klèrzé téi fé la plui konm lo botan, in tan sé la bourjoizi la pran lo pouvoir, ni atann touzour la viktoir lo prolétarya mé èl i ariv pa pou l’instan. Nou l’aprann nout zansète lété anshéné, pli tar angazé, aprésa ésploité é zordi ankor kolonizé épi néokolonizé.

Pou sak i konsèrn anou, mèm apré 1946, nou lé ankor dann l’ésploitasyon kolonyal épi néo kolonyal é ni domann koman nou va fé pou sort dann in pyèz konmsa. Tansyon pangar lo kolonyalism lé madré : li sort par la port mé li rorant par la fénète. Domann solman bann péi néna lo fran Cfa ousa i inprime z’ot moné : va réponn azot sa i inprime laba dann Chamalières sou l’kontrol lo trézor piblik fransé. Domann azot ankor kisa i komann z’ot rishèss nasyonal, va réponn azot sé l’ansien gouvèrnman kolonyal sansa bann sosyété lo lansyène puisans kolonyal la monté dann son l’intéré… Par o l’aplikasyon in tréyté zot la sign inn avèk l’ot in momandoné..

A ! Mi antan, dann mon zorèye inn-dé apré di amoin sak mi di la pa vré. Poitan si ! Poitan vérité-la bann gran médya i kashyète sa bien konm k’i fo é nou nout pti voi lé posib pèrsone i antan pa. Mé la pa pou sa ké zot néna rézon é nou tor. Si lété nou k’la rézon é san pour san. Pti marmaye kan moin té i sava shèrch Témoignages, moin té i shant an rotournan : « Témoignages i di la vérité ! ». Faktèr té i rogard amoin épi té i bouz la tète-i fo dir li lété indéksé boug la é son vérité té i sava dann sans son l’intéré. Arzout èk sa li té i fé sa natirèlman an suivan lo kouran bann zidé dominante.

Mi vé arvir in pé dsi kosa i fo fèr é sirtou kosa i fo pa fèr dann la sityasion ni lé é promyé lidé i vien amoin : i fo zap bann zidé dominant sirtou pars sé bann zidé fos, i zèrm dann la tète in minorité i viv é i kalkil solman suivan son l’intéré épi sète zot bann mètr... Zot i oi madam Girardin-in zoli pti fam bien sinpatik é tou-mé oila lo problèm, èl lé o sèrvis son bann mètr é son bann mètr sé bann profitèr néo kolonyal. Atann bann mézir i sava prann épi dékode zot va oir si moin na poin sansa si moin na tor.