La Franss sé lo péi la trafik lo référandome dsu l’indépandanss dann lé zané Soisante dis . Sé lo péi la pa mète lé moiyin k’i fo pou pèrmète lo dévlopman d’Mayotte .La pa mète non pli lé moiyin k’i fo pou assur la sékirité dann Mayotte.

Mé La franss sé galman lo péi la mète bannzil komor dsou son joug é la pa fé arien pou assur bannzil komor zot dévlopman. Sé èl la mète komor dann lo fran CFA, in manyèr pou anpèsh bande péi dominé dévlop azot.

In romarke in bonpé d’moune la fé par raporte L’afrik.Bande zanglé épi bande franssé l’avé koloni é la plipar néna zordi zot lindépandanss, mé lomoune i romarke bande zansien koloni franssé lé moin dévlopé ké bande koloni franssé .

Astèr si ni parl in pé la sékirité dann komor, kossa ni konstate ? Ni konstate péi komor la konète in kantité kou d’éta é lo bande kou d’éta té i vien par raporte bande mèrssénèr souvan dé foi rokrité dan La franss... Mi parl lo Bob Denard épi lé zotkonplotèr ;Mi parl ossi bande prézidan assassiné.

Lé vré é nou la vi dann télé na poin la sékirité dann lil bande sultan batayèr. Nou la vi dann télé koman demoune i gingn kou d’sab é koman i atake azot ziska dann kar... Sa lé vré, mé i fo komanns lé shoz par zot komansman pou konprande l’afèr épi son tourné-viré.

Zordi lo résponsab lo chaos-La franss- i di li sava mète l’orde dann toussa mé éské li lé sir li sa gingn fé sa an passifik ?éské li panss lo lakssyon vyolante sé lo méyèr fasson pou azi.éské èl i mète aèl la plass bannzil komor : el i koné bien la répiblik komor néna poin lé moiyin pou rokèye 250 pèrssone par zour donk in total dis-kinz milpèrsone sir plizyèr moi.

Pli grav ké toussala La franss l’apré drèss in baryèr dann lo pèp comorien san kalkil koman pèp –la i pé rékonssilyé inn foi pou toute marsh ansanb min dan la min.. La vyolanss zot i vé, mé zot lé biensir la vyolanss i sava pa rotourn in pé konte zot.

A bon antandèr, salu