Oté

La vi éstraordinèr in l’ansien prézidan l’Uruguay : la vi Pépé Mujica-morso niméro1

Justin / 12 novanm 2018

Néna lontan mi vé parl in moun konmsa mé moin téi gingn pa lokazyon pou vréman. Zordi mi gingn lokazyon pars Didier Robert prézidan konsèy réjyonal la déside fé fortine rouvèrtman é dovan toulmoun, san ont, avèk larzan piblik konm zot i koné. Ala mi adrèss ali lo bonzour José Mujica, in l’ansien prézidan in péi l’amérik di sid i apèl l’URUGUAY. Mi anvoye sa pou li an souvnans tousa bann moun na poin sink san éro par moi pou zot viv, pou tousa d’moun la fin di moi i komans avan lo kinz.

JPEG - 43.6 ko

Ala in promyé parol gran mésyé-la :
« Mi doi dir moin lé ingra. Mi dovré kroir Bondyé pars moin la pass dann tout difikilté. Zordi moin lé ankor vivan vi k’moin la fine dépass lo laz katrovin z’ané. ». Ala sak José téi déklar in zournalis dann tan li lété prézidan la répiblik l’uruguay dann son kaz néna zis 45 mète karé, lo mir tash-tashé, pa tro loin la kapital Montevidéo.

Mésyé-la lé koni par son bann diskour kont la sosyéété la konsomasyon épi pars li la otoriz plant zamal pou ansèrv konm médikaman. Li la otoriz lo maryaz rant moun mèm sèks épi la prokréasyon. Avèk li lo péi néna bann loi sosyal an parmi sak lé plis évolyé dsi la tèr. Li la fé donn lotorizasyon pou bann demoun avorté é sa la fé in bèl dézord dann in péi demoun i pratk la rolizyon katolik..

Lo prézidan lo pli pov ké l’avé.

Kan lo pèp la mète ali prézidan li la désid kontinyé viv dann son fèrm é li la pa vouli alé viv dann lo palé lo prézidan. Li la gard dis pour san son salèr pou li, é li la done katrovindis pour san bann z’asosyasyon pou amenn bann nouvo projé sosyal..A té soué mésyé Didier !.

Névan dann l’izolman dsi katorz zané la prizon.

Lo prézidan i rogard toultan an diréksyon l’avnir ; li lansien gériyéro, lo tupamaro, é l’ansien prizonyé la pass katorz zané dann la prizon épi nèf z’ané dann l’izolman. Li téi di : « Mi pans dann mon gouvèrnman nou la toultan vèye la fason bann jenn i manifès z’ot zidé ». Aprésa li té i di ankor : zot la vi bann kandida pou zéléksyon prézidansyèl i mète pa kravate mé rapèl azot bien lo promyé dépité la pa mète kravate sé moin.
Pépé mujica la akèye an om lib plizyèr prizonyé la baz amérikène Guantanamo (Cuba) épi li la akèye galman plizyèr migran La syrie, sirtou in bann zanfan-mèm si bonpé zéléktèr téi konpran pa sa !
La pankor fini