Médame, zé Méssyé, la sosyété koze avèk mwin sé koze avèk in kouyon, mé sé o pyé d’lo mir k’i oi lo masson. Mézami, kozman-la, a s’ki paré sé in gran savan téi apèl Einstein la invante sa. Invanté ? Pé s’fère mé si mi baze dsi mon prope léspèryanss, la plipar d’tan sé bande de moun lé pa tro kanifyé i nyabou invante band kozman konmsa. La prèv an é, toute band sirandane néna issi shé nou la pa band doktère la invante sa.La plipar i panss téi mète trou p avèk papa pars i koné pa oussa i sava mète lo katriyème. Alé ! Nou v ‘arète diskitedsi lo droi la propriyété intélékstyèl pou koze dsi lo kozman li mèm. Mon poinvizé ? Mi domand amwin si dann la sosyété in moun i pé an avoir lo droi arète an plass é pa bouzé. Mi panss ke oui, mé la plipar d’tan ni rèss pa anplass : mèm lo moun i bouze pa son majinassyon i arèst pa an plass. Pars i fo pa ni obliye nou néna in motère i apèl sèrvo dann noute tète, sa i arète pa zamé sa : vinkate dsi vinnkate sa i fonksyone, san konté band milyar ép milyar baktéri nou néna dan nou é sa i boss toultan. Donk lé bien vré ni pé pa rèss an plass, mé sa i vé pa dire ni avanss : avanssé sa i vé dir progréssé, é dann la boush in savan, sansa sou son plime i vé dir ké sa. I fo ni avanss pou pa tonbe atèr ? Pétète, mé d’apré mwin ni avanss touzour ké ni vé ou ké ni vé pa. Alé ! mi kite azot rofléshi la dsi é ni artrouv pli d’van. Sipétadyé.