Médame zé Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami zordi mwin la trouv in pti provèrb zaponé é mi doi dire li bote amwin bien. Pou kossa, pars li mark bien noute frazilité dsi la tère. In bouzi dann van, zot i koné sa sé in kékshoze i pé tinde prèss san k’wi atande é kan li la fine tinde ni koné kossa i ariv anou, la mor san passpor.

Solman kan mi oi lo parkour l’imanité la fine fère dopi kék milyon d’zané, mi domande amwin bien koman l’om – l’homo sapiens – la fé pou travèrs in tan longue alé oir d’ote zéspèss myé armé aparaman, pli solide, pliss fé pou l’atak é pou la défanss la fine disparète.

Finalman, sanm pou mwin lo sèl énmi l’om néna pou vréman sé li mèm é konm i di afors zoué èk dofé li va bril son doi. Mi éspère zot i konpran amwin, zot i konpran dann kèl tablatir nou lé zom nou la fine mète anou é pé s’fèr si ni di l’om sé in bouzi dann van, sa i vé pétète dir sé par nou mèm, nou lé konmsa. Antouléka sé sak mi panss.

Alé ! Mi kite azot rofléshi la dsi é ni rotrouv pli d’van. Sipétadyé.