Mizik-a-boush ! Kosa i lé sa ? Dann tan d’avan té i apèl sa osi kordéon-a-boush ; koméla i di l’armonika pars kréol i ging lir mot’a-mo. Lété pa rar, mi an souvien, dann bann ti kartyé rokilé, in moun téi zoué son l’armonika pou son plézir pèrsonèl, sansa pou kontant in pé z’orèy lé z’ot. Mi souvien étan marmaye momon té i anvoye amoin la boutik é souvan dé foi l’avé in zouar d’kordéon-a-boush. L’èr-la lo komisyon té i dir in pé plis lo tan.

Astèr nout provèrb, sa i vé dir solman shakinn i amenn son vi konm li gingn avèk son karaktèr épi son fantézi. La mizik la vila, a lé pa monotone, sa lé varyé vèy pa koman. Zot i pans pa konm moin ? Alé ni artrouv.