Bon nouvèl d’in koté, mové nouvèl l’ot koté par raporte l’inégalité i dévlope dann noute sossyété é lo nivo d’vi in bonpé d’moune l’apré dégréné. Sirtou kan i di anou néna 40% -apépré- d’moune lé pov issi La rényon, kan i di –é sa sé bande shif l’Insee-néna 120000 pèrsone lé bien pov,mèm karéman mizèr é oblijé débate pou sirviv.

In sityassion d’irzanss é néna poin pli irzan ké sa : dann mèm pa in moi bonpé zanfan sar an vakanss é sak zot paran lé pov- 50%- lé a d’mandé koman zot i sava fé pou pass lo moi d’vakanss i prézante dovan nou..Biensir mi anparl bande demoune lé bordé dann noute sossyété, pars néna ossi sak lé an o, sak néna bonpé rishèss dann noute sossyété é lé z’inn é lé z’ote, néna poin lo mèm sizé d’traka.

Néna sak i panss voiyaz, uikinde, sorti, réstauran, lotèl é sé zot sizé pars mwin la antande bande réstoran –lotèl i manke 7000 pèrsone pou travaye dopi koméla ziska la rantré moi d’séktanb é i trouv pa non pli bande moune-la. Pou kossa ? Pa pars nou lémal formé dann bande métyé la bézoin travayèr, mé pars si wi rante dann trin lo CDD, wi sava dérèg oute vi, an partikilyé pou sak i apèl zalokassion é pou in boute tan.

La lozik bande préstation i vé ké si wi gingn pliss, ou lé blijé déklaré é sé la ké lo sistème i mète aou dann in n’ote lozik é pliss difikilté i atande aou par d’van. Sé sak i ariv dann in péi lé mal-dévlopé é lé pa paré pou shanjé... An atandan ni koné la vi lé plizanpli shèr pou sak lé an-ba é la vi shèr sa i rabote lo trépé d’pouvoir d’asha k’in pé néna- é sa i roprézante 40% bande rényoné.

Drol de péi ! la vi lé shèr é plizanpliss shèr, mé ofisyèlman ni koné pa pou kossa. Néna poin lontan mwin la gingn in l’okazyon : luil téi vande 2,99€ alor mwin l’ashté, mé avan, san promossion, luil téi koute 1,70€.Sakré diféranss ! Parl pi dori, dobèr, lo grin, sossiss, é toute sak in kréol normal la bézoin pou ranpli son bouzaron... Astèr mi parl pa lo moune i manz in ropa par zour épi i grignote in pé.

Alor l’irzanss lé la : li lé la pou bande zanfan bande famiye pov, li lé la pou bande pti rotrété, li lé pou bande zétidyan, li lé la pou bande travayèr pov é kan lo parti i domande bande mézir d’irzanss, la pa pou kriye pli for k’lé z’ote, mé sinploman pars noute sossyété l’apré kapoté é bonpé rényoné lé riskab santir sa dann zot santé épi dann la manyèr zot i zère zot vi.

Tanpir si sa i déranz lo trin-trin in pé, mé kan la vérité lé konmsa i fo dir, la pa bézoin kashyété.

A bon antandèr salu !