Konsèy zénéral, group l’Alyans la kas an dé. Avan sa l’ariv sak zot i koné pou z’éléksyon dépité. Avan sa ankor l’ariv sak l’arivé Sint-Sizane. Avan avan sa la fé z’éléksyon sénatèr é zot lé o kouran lo trikmardaz la spasé. Zot i souvien lo l’anboulkidi z’éléksyon kantonal. Anfin, zot i rapèl lo rézilta z’éléksyon réjyonal. In pé i di, tousala l’arivé pars bann kominis té pa dakor rantre zot, sétaki té i manz lo foi inn-a-l’ot. D’ot i di : « Poitan, bann kominis té dakor é l’èr-la l’ariv sak l’arivé ! ».
Dimansh, moin té an parmi in bann kamarad épi, momandoné, la konvèrsasyon la dévir la dsi. Défoi lété in gran tristès. Défoi in pé té i di sé lo déstin. Défoi inn-dé té i ariv pa mèt zot kolèr dan zot posh épi zot moushoir par dsi. Konm inn té i di, si nou na poin l’inité, nout bann z’advèrsèr i sar manz anou èk ti kuiyèr. Madam Orphé té i di pa èl la bouf Gironcel tou kru ? Dopi si lontan zot té i rèv tras in kroi dsi nou, fini avèk nout ras, fini avèk la ras Parti kominis, éfas son tras dan l’istoir nout péi.
Mi sort lir in mésaz in ga i di konm sa : « Sak i réini anou lé pli for ké sak i diviz anou ! ». In gayar fraz an réalité, mé kisa i lé lo "nou", kisa k’i mète la-dan ? Ousa i lé "lo sak i réini" ? Mi konpran bien, dan l’éspri lo ga, sé lo l’intéré lo pèp rényoné, sé lo shanjman dan la sosyété, sé la défans la natir, épi tout sak i fé in bon program pou La Rényon. Sa sé sak lé pli for, mé mi domann amoin si tout i partaz sak i réini anou... dann fon nout kèr, sinonsa dsi l’bout la lang ? Si lé dsi l’bout la lang, nou lé pa pou artrouvé. Si lé dann fon nout kèr, lé sir nou va rotrouvé.
Konm di l’ot, la vi va éklèrsi tousala.

 Justin