Médam zé Mésyé, La sosyété mi sort trouv in kozman Kolush-in gran komik fransé la fine dépass la vi-kozman la i di sak zot i pé lir an-o la. Moin pèrsonèl mi trouv li lé valab. Pou kosa ? Pars in mir sé pou bar shomin é in pon sé pou pass la riv yèr pou alé in n’ot koté. Inn sé la fèrmtir, l’ot sé la rouvèrtir. Alor lo shoi li donn anou sé in shoi in portan : soi ou i vé la rouvèrtir dsi lo mond, soi ou i vé anklav aou. Antansion pa ou i viz inn épi ou i fé tout pou trap l’ot. Par égzanp ou i pé di ou i vé rouv aou dsi lo mond donk détaké, épi fèr tout sak ou i pé pou anfèrm aou par raport lo mond donk také.. Alé ! mi kite azot rofléshi la dsi é ni artrouv pli d’van. Sipétafyé.

Nb - Proverbe cité par Coluche : la vie mettra des pierres sur ton chemin. A toi de décider si tu en feras des murs ou bien des ponts.