Na inn-dé somenn, madam Merkèl la di, dann in kozman ofisyèl, la koléktivité bann kultur la kass par boute, i marsh pa ditou. Madam Merkèl nana son mèrl l’ote koté la frontyèr, sé pti prézidan la Fance. Ala ké li ossi li di, dann in kozman dann télé, la kominoté bann kultur i gaz pa, mèm la foiré. Dabor inn, kissa la déside so kominoté-la si la pa zot mèm ? Kissa la anparl sa dann kanpagn zéléksyon si la pa lo pti prézidan la France ? Mé sak lé vré, sé ké Sarkozy, boudikont, li la poin in vré l’opignon déssi tousala, li rode arienk rakol votan pou gingn zéléksyon.
Pli séryèzman, akoz li la pa di, toute bann kultur lé égal inn-a-l’ot, i mérite in mèm konsidérasyon, i mérite l’Etat i rogard azot in pé myé ? Sirman pars li pans pa konmsa. Sirtou pars dann fon son kèr, sanm pou moin, li kalkil la kultur fransèz lé sipèryèr sèk bann z’émigré la vni instal dan la France. Kossa mi di la ? Sarkozy la pa in pti zanfan z’émigré sa ? Li la pa in désandan la sivilizasyon magyar ? Biensir, mé sak lé drol, moin na konm l’inprésyon li la fine oubliyé.
Mi èmré bien in sosyété ousa, kan i akèy in z’émigré, i rosoi ali kèr klèr lé dé min rouvèr. I pran lo méyèr sak li aport dann son sivilizasyon é i angant ali pran sak li trouv konm méyèr tradisyon sir plas. In sort kréolizasyon, mé bien konpri, pou pa anpèrd sak lé bon. Dizon sak zordi nou l’apré kour déyèr, tout sak zordi nou l’apré sèy rodone favèr.
Mé sa i fé pa an in zour, i fo l’tan. Konm di lo kont : « La vitès nana son tan ! ».

Justin