Sa lé bien vré émèm la syans fizik lé dakor avèk sa. Ou i sort pa zéro a l’èr pou ariv san toutsuit pou toutsuit. I fo tienbo kont lo l’aksélérasyon, lo tan épi la distans out véikil la fine fé. Mi pans zot lé dakor avèk moin. Mi kroi mèm in marmaye lékol i pé z’ète dakor avèk moin. Astèr sé in provèrb é konm tout provèrb li nana son sans.

Kèl sans li nana ? Pou komansé li vé dir anou i fo kont avèk lo tan pou trap in rézilta : donk i fo pran lo tan. Dézyèm z’afèr, li amontr anou sé k’i fo pa konfann la vitès avèk la présipitasyon sansa ou lé riskab kass out né. Aprésa ni pé dir galman i fo zèr son tan pars lo tan sé in marshandiz-in marshandiz natirèl mé in marshandiz kant mèm - si ou i zèr pa out tan ou i réisi pa dan la vi.

Zot i oi, lo kozman lé pti, mé lo sans lé konplé. I fo bien tiliz kozman-la si ni vé pa pèrd nout tan.