Nana in patoi k’i di konmsa : « La vitès nana son tan ! ». Mi pans, daoir sa i vé dir la pa bézoin préssé... sa i ansèrv de riyin. Mé, konm toute patoi, na dé foi li lé vré, na dé foi li lé pa vré. Dizon, par ébzanp, si in moun i domann aou in sèrvis préssé solon li é pa solon ou, patoi-la sé in bon répons pou li. Mé si d’fé i pran dann out kaz, si an débitan in pti pissa d’lo i pé étinn ali, apré lé tro tar, donk nout patoi lé pa vré ditou dann in ka konmsa.
Dan d’ot ka, pou fé in n’afèr i fo ou i pran aou lontan an avans, i fo prévoir, pars rézilta-la lé pa pou toutsuite, lé pou dann inn sé zour. L’èr-la, oplis ou i tarde pou komansé, sé oplis ou va tarde pou arivé, pou gingn rézilta ou l’apré éspéré... Si Konsèy rézyonal l’avé pa, an 1999, lans la politik lotonomi énèrzétik, nou noré tardé avann komans oir in bon rézilta. Dimansh, dann son diskour, Prézidan la Réjyon la di, i tarde pa ni fé la fète pou lo san-milyèm shof-lo solèr, é nou lé an 2009. Kossa noré arivé si nou l’avé tourn nout pous dé-troi z’an ? Nou noré été loinn trap so rézilta-la… épi lotonomi énèrzétik, nou noré sirman agard sa dann in trou… nou nora pa gingn trap sa zamé. Kossa ? Mi antan dopi issi in mal fondé apré di sa lé pa grav. Pa grav ? Bin kan nora pi d’pétrol, koman va fé ? Kan v’arète avèk sharbon, koman va fé ? Kossa ? Ou va manz manzé fré ? Oui, si nana ankor d’manzé... Pars amène lé shoz an dékontrakté lé pa touzour bon. La vitès nana son tan ? Sa lé vré, konm pa !

Justin