Lo nouvo sokrétèr d’État pou l’outremèr sé in boug préssé. Li la fé in loi program, épi li vé Konsèy zénéral avèk Konsèy zénéral i donn zot l’opinion déssi, vik lé obligatoir. Soman, li la di konmsa, son prozé la pa bien anshevé, alor étonn pa si i shanj inn-dé zafèr dedan.

Kossa ? Lé dé Prézidan la gingn in koud’san. Zot i konpran pa i domann zot l’opinion déssi in prozé makoté. Pli pir, dann tout l’outremèr, tout demoun la pa kontan : kisoi bann Shanm komèrs, kisoi bann patron, kisoi bann sindika travayèr, kisoi bann konsèy ékonomik é sosial. Partou, banna i di so nouvo loi-la, sa in manièr pou kass la kroissans nout lékonomi. Mèm dann Zantiy, bana i di ali arpran son larzan, son san million i di la armète an plis-la. Oté ! Lé sérié in kozman konmsa. Sa in boush-ta-guèl sa !

Kan sosis la pankor bien paré, i vann pa ! Manzé la pankor kui i tir pa o fé ! Pti shat lo zié la pankor rouvèr i tir pa déor ! Alor méssié Jégo, fini out afèr, apré va arkozé si ou i gingn fini. Ala pa k’lo minis l’intérièr, "Mam" konm banna i apèl aèl, i fé dir lo prozé la pankor paré, lèr pou diskité la pankor vni. La vitèss nana son tan !

Justin