Dann zoinal dopi dé moi dé moi i anparl lo pti koléoptère é la fasson k’li néna pou détrui bann rish moush a myèl. San rode ki ki pèrde é ki ki gagn bann sèrviss konpétan - lo mo lé pétète in pé for - la désside aplike la prossédir prévi dann in ka konmsa dan La franss é la mète a bril bande zabèye é la protèstassion bann sindika plantèr, bann propriéyétèr d’rush sa la pa ansèrv arien. Brilé sé brilé mi di azot. La brilé !

Mi souvien sokrétèr zénéral la CGPER, méssyé Moutama, plizyèr foi, la domande in trètman diféranssyé avèk bann moiyin pou lité k’i égziss, ké lé pa radikal mé i fé léfé firamézir. Mé dann lo kartyé Sin-Philip la brilé san anpèsh d’ote zélvaz moush d’ète kontaminé. Pli pir la kontamine bann moush sovaz é pi banna la routourn kontamine bann moush doméstik.

Mi sorte antann dir la préféktir la fé in nouvo l’arété pars lo pti koléoptère té fine atake bande moush a myèl sovaz é konm li lé déor, na poin d’rézon ké li rante pa anndan - dann bann zélvaz domèstik. Donk la désside arète brilé épi ansèrv bande métode mwin brital pou vanz konte lo pti koléoptère.

Konm diré l’ote : i vo myé tar ké zamé, mé la voi la rézon néna difikilté pou fé antann ali dann noute péi.

A bon antandèr, salu !

Justin