I prétan dir épi lé vré mèm, la-ba dann bordaz l’Érop, lé blizé mète in kota pou bann péshèr poisson, suivan lo kalité k’i pèsh, suivan landroi i sava péshé. Nana inn-dé léspès poisson lé an danzé, nana in pé lé pa an danzé pou l’instan ! In légzanp, l’Érop i sort di, i fo éstop pèsh thon rouz dann la mèr méditérané akoz an sis moi la fini tiliz lo kota pou in n’an. Si i kontinié, poisson-la lé riskab disparète dann landroi-la.

Alors, mi antan i di k’na poin lo mèm problèm dann loséan indien. Kossa ? Mi éspèr sa la pa in l’invitassion pou bann barbar vnir pèsh issi pou détrui nout bann rossours la mèr. Akoz bann sosiété dann l’Érop zot i sousié pa pou prézèrv bann léspès poisson épi zot lé pli danzéré ké d’ot péshèr d’ot péi ki vien pèsh par koté nou.

Pou moin, sa lé inportan, akoz moin la souvan antann dir, nout lavnir lé kant mèm in pé dan la pèsh. Si ni fé pa antansion koméla, kansa nou va pran prékossion. Kansa, épi kissa, va donn in kota, si i fo donn kota. Tansion-pangar, lo tan va komans diskité, épi v’ariv - si i ariv - in bon solision lo thon sar fine ariv grossèr sardine (1). Va arèst arienk bann ti.
Alors, i fo ni vèy sa konm lé dsi l’ fé. Nou la bien di la COI, i doi koz in sèl voi ! I fo voi-la, i fé antann ali !

(1) I paré pré d’kanada la-ba, la tèlman tié la mori ( lo cabillaud), ké bann poisson-la, koméla, i ponn étan pti. Anfin pli pti k’dann tan lontan.

Justin