Mi pans zot i koné séga-maloya-la. Sa in shanson lo group « Marsh tousèl ! ». Lé bien gayar pou ékouté, kisoi lo mizik, kisoi lo shanté, kisoi la voi lo shantèr, in bonpé d’moun i koné ali, par raport son promyé tib té i apèl « Jessica na kouraj ». Mé pétète zot va di, pou kosa, zordi Justin i anparl anou d’sa. Pars, mi suiv l’aktyalité é moin lé forsé pou romarké l’anvi avèk la zalouzi sa dé santiman négatif ni kotoiye tou lé zour, shak zour é sa lé bien partazé rant in bonpé d’moun.

Si mi suiv mon natirèl moin sré plito tanté pou dir mon promyé mouvman sé pou ète kontan kan in moun i fé in n’afèr d’bien. La poin arien i kontant amoin konm kan mi aprann in dalon, mèm in z’étranzé, la nyabou fé in n’afèr bien korèk, kisoi pass in gro diplôme, kisoi invant in mashine, kisoi ankor trouv bon médikaman dann in zèrb. Moin lé kontann sa, é solon moin toulmoun i dovré z’ète kontan konm moin.

Mé, élas - ménélas, mon kèr lé an filas, moin lé forsé d’ romarké la pa touzour konmsa ké lé shoz i éspas é tout demoun i partaz pa sak mi pé apèl in santiman pozitif. Mèm dann mon l’antouraz ! Mi apèrsoi néna demoun lé zalou konm in pou pou in goute de san. I fo zot i diminyé lo mérite lé z’inn épi lé z’ot. Si posib, zot i di la pa la pèrsone la fé sa-konm la di, dann tan, la pa Edmond Albius la fé gonn la vaniy an promyé.

Ousa mi vé arivé moin-la ? Mi vé fé la romark dsi la mor Paul Vergès k’inn-dé pèrsone la sèye défé son répitasyon avèk lo pti moiyin zot néna, é lo pti pé ké zot la fé dan la vi. L’èr-la rozman pou zot lo ridikil i tyé pa, mé li afébli kant mèm in pé… Mi sa pa di lo nom inn-dé, mé sak moin lé sir sé ké l’istoir lé riskab obliye azot, vitman-vitman, mé li obl ar pa Paul Vergès.

NB Néna in gran bononm dann l’istoir La Rényon té i apèl Nicol Robinet De La Serve. Li la viv dann promyé moityé lo dis névyèm syèk, é lo azar i fé bien lé shoz sé li ké la réklam l’otonomi pou La Rényon. Son poinn vizé, fé l’alyans rant la téori épi la pratik. Domaz li lé mor jznn, mé son vi la pa sète n’inport ki.